Vinnuskúlar

Maritimar útbúgvingar eru førleikagevandi útbúgvingar, sum liggja millum fólkaskúla og hægri útbúgvingar. Útbúgvingarnar og skeiðini eru skipað sambært altjóða krøvum, hava altjóða IMO-góðkenning og lúka øll STCW krøv. Skúlarnir eru útgjørdir við allari nýmótans tøkni, so sum maskin- og navigatørsimulatorum. Trygdardepilin er partur av Vinnuháskúlanum, útgjørdur eftir galdandi krøvum, og virksemið fer fram eftir IMO góðkendari góðskustýriskipan, og skeiðini lúka krøvini í STCW-konventión og ásetingum frá føroyskum myndugleikum. Eisini verða skeið hildin í grundleggjandi eldsløkking, fyri starvfólki á virkjum og stovnum, ella einstaklingum. Nærri frágreiðingar um maritimu útbúgvingarnar og skeiðini eru at finna á heimasíðuni hjá Vinnuháskúlanum og Sjónám.
Heilsuskúlin bjóðar út útbúgvingar sum heilsuhjálpari (HHJ), heilsurøktari (HRØ) og námsfrøðihjálpari.
- Á HHJ lærir tú um røkt, umsorgan og stuðul til dagligt virksemi við støði í lívssøgu borgarans. Eftir lokna útbúgving kanst tú starvast í heimatænastuni, á ellis- og røktarheimum og í eldrasambýlum runt landið. Heilsuhjálparaútbúgvingin gevur atgongd til heilsurøktaraútbúgvingina.
- Á HRØ lærir tú um likamliga og sálarliga sjúkrarøkt, umsorgan við endurmenning, heilsufremjan og sjúkufyribyrging sum endamál. Tú arbeiðir á sjúkrahúsi, ellisheimi, sambýli ella á øðrum heilsufakligum øki.
- Á námsfrøðihjálpara lærir tú at arbeiða sjálvstøðugt við námsfrøðiligum og umsorganarligum uppgávum. Arbeið innan dagstovna-, skúla- og almannaøkið við mennandi og stimbrandi virksemi, sum styðjar upp undir menningina, trivnaðin og læringina hjá børnum, ungum og vaksnum.
Hægri Nám kemur undir stuttar framhaldsútbúgvingar og parttíðarútbúgvingar, sum hava sum yvirskipað endamál at geva lesandi fakligan førleika til ávís yrki. Útbúgvingarnar verða bodnar út á Glasir. Møguleiki er at lesa stutta framhaldsútbúgving í kunningartøkni, byggitøkni og framleiðslutøkni. Hesar útbúgvingar, sum vanliga taka millum 2 og 2½ ár, geva møguleika fyri framhaldi á bachelorstigi. Treytin fyri at verða tikin inn á eina stutta framhaldsútbúgving er lokin miðnámsútbúgving. Somuleiðis er møguleiki at lesa parttíðarútbúgvingar í búskapi, marknaðarførslu og leiðslu á akademi- og diplomstøði. Parttíðarútbúgvingarnar taka millum 2½ og 4 ár, og geva tær møgleika fyri framhaldandi útbúgving. Akademistigið gevur møguleika at lesa framhald á diplomstigi og diplomstigið gevur møguleika til framhaldi á masterstigi. Í ávísum førum geva parttíðarútbúgvingarnar eisini møguleika til at halda fram á bachelorstigi og/ella kandidatstigi. Upptøkutreytirnar til parttíðarútbúgvingarnar eru treytaðar av, hvat fyri slag av útbúgving talan er um, og á hvørjum stigi útbúgvingin er.